السودان اليوم / السودان اليوم

الهلال ود هاشم سنار – اسبانيا وروسيا.. بقلم محمد عبد الماجد



30 يونيو، 2018

محمد عبدالماجد

السودان اليوم:
• التمارين بتشحتف روحنا.
• الواحد (رقبتو) من الشحتفة بقت زي رأية الكورنر.
• بتكلم عن تمارين الهلال المنقولة على قناة الهلال الفضائية.
• نقعد نعد في لاعبي الهلال زي الزول القاعد يعاين في (كراس الكشف) في مناسبة عرسه.
• فلان ما جاء.
• وفلان سافرت لعرسه من الميناء البري مالو ما جاء؟.
• بشيلها معاه.
• بالمناسبة دي متوكل كولا أمس ما ظهر.
• مالو؟.
• ان شاءالله المانع خير.
• الواحد بقى يتلخبط بين متوكل وفارس.
• المحترفون الناقص فيهم منو؟.
• الحمدلله آخر انضباط.
• الحافلة قفلت.
• ما عندنا أي مشكلة.
• أي شيء تمام.
• الله يديم الافراح.
• والاستقرار.
• كدي شوفوا لي هارونا قاعد؟.
• للأمانة هارونا قاربا جاب ليه قون في الدفاع الدمازين من زمن معتز كبير وهيثم طمبل ما شفناه في الهلال.
• ما عاوزين نتكلم من بدري.
• خشمنا عندنا.
• وين اوتارا؟.
• فارس بتمرن بي مزاج.
• وين شلش؟.
• قااااعد.
• أفول.
• التمرين كله نقعد نحسب في اللاعبين.
• الجاء والما جاء.
• والمتأخر والما متأخر.
• والمزاجو عالي ، والقافلة معاه.
• تمارين الحراس ذاتها بنقعد نراقب فيها.
• جمعة وابوجا.
• يونس.
• البنط والما بنط.
• ولامين والزغفوري.
• وفلوريان.
• وفتحي ببشير.
• ما بنخلي زول.
• جيبا.
• تقول عندنا مناسبة.
• نحرس في قناة الهلال وقت التمرين زي الحارسين لينا (صيوان).
• في شوق حاصل للهلال.
• شوق شديد.
• ما عارف يمكن زاد من شوقنا للهلال.
• زاد الشحتفة.
• برانا مشحتفين.
• انتوا قايلين اقوان الدقائق الاخيرة دي غريبة علينا؟.
• في ناس شافوها بس في .
• اسامة الثغر مرة جاب ليه قون في عوض دوكة حارس مرمي الموردة في آخر ثانية.
• هدف راحت فيه (طاقية) دوكة.
• وخسرت بعده الموردة.
• وشيبوب في الدوري دا جاب ليه هدف في الخرطوم الوطني الناس كانت بتلقط في العدة.
• عاوزة تقوم.
• انتوا قايلين الأقوان البتخترق (الحيطة) جديدة علينا.
• احمد حضرة مرة عملها في المريخ.
• الحيطة بتاعتهم لغاية الآن ما قامت ليها قومة.
• حيطة المريخ مايلة من الوقت داك.
• لا مجلس منتخب.
• لا مجلس معين.
• زمان وقت كنا في المدرسة كان استاذ اللغة العربية بخش الفصل ويلقي الفصل (جايط) ، يقوم يعين ليه ألفة جديد.
• نظام هو ابوالفصل.
• استاذ الرياضيات يجي يلقى قرارات استاذ اللغة العربية والألفة الجديد ، الكلام ما يعجبو.
• يقوم يعين ليه ألفة جديد.
• مدير المدرسة يسمع بالخبر يخش الفصل بعد الفسحة ويعين ليه ألفة آخر.
• نحن نتلخبط.
• من الفة لي الفة.
• ما بنعرف (الالفة) الرسمي منو؟.
• في النهاية الفة مدير المدرسة هو البيستمر.
• الفة كمال شداد.
• كمان كمال شداد بيلعب.
• انتوا لو عاوزين ليكم (مجلس) يتعامل مع ناس الدهب، جيبوا مجلس محمد الشيخ مدني.
• مجلس (مواقع التواصل الاجتماعي).
• مجلس شغال بالصور.
• المجلس يقتحم مكتب المريخ التنفيذي.
• تقول نحن في العراق.
• كلمة (اقتحام) في الرياضة ما في.
• والله الفيفا تسمع بي (اقتحامكم) دا، شارع العرضة تحرمو عليكم.
• مجلس عشان يتعامل مع الاتحاد ما بتلقوا غير مجلس سوداكال وقريش وشمس الدين.
• غير كدا، ما عندكم طريقة غير بطولات (مواقع التواصل الاجتماعي).
• الهلال بكرة سوف يلعب في سنار.
• السلطنة الزرقاء.
• قناة الملاعب أعلنت عن نقل مباراة الهلال وود هاشم سنار في كأس السودان.
• والشوق حاصل في الهلال.
• الناس عاوزة تشوف فارس.
• وهارونا.
• وتاموس.
• الناس عاوزة تشوف شيبوب وبشة الصغير.
• الشوق حصل.
• حظكم يا ناس سنار.
• بكرة سنار ح تكون محتفلة ومبتهجة بالهلال.
• يعني عادي جدا الناس تضحي بي مباراة اسبانيا وروسيا.
• انيستا مع كولا ما بنافس.
• هلالنا ولا اسبانية غيرنا.
• يا زول الناس منتظرة الهلال زي هلال العيد.
• آخر مباراة للهلال شفناها في مروي أمام أهلي مروي.
• مباراة الدفاع الودية كانت مقفولة.
• ما شفنا غير الاهداف.
• والاهداف ضاعفت الشحتفة.
• بكرة عاوزين نشوف اول هدف للهلال في القسم الثاني للموسم بيسجلو منو؟.
• عاوزين نشوف دفاع الهلال كيف؟.
• وهارونا.
• والصاعقة نزار حامد.
• نزار حامد ما شاءالله عليه رجع وهو محافظ على وزنه.
• ما في أي زيادات.
• الصاقعة رجع بشهية مفتوحة ورغبة كبيرة.
• الصاقعة مع شيبوب في وسط الهلال ح يكون حاجة مدهشة.
• عاوزين نتفرج.
• نشوف بصمة لامين.
• ونظرية الزغفوري.
• مباراة اسبانيا وروسيا (مشفرة) لكن لو جابوها في المفتوحة ، الهلالاب ما بعاينوا ليها.
• عندهم مباراة.
• عندهم شوق حاصل.
• المريخاب ذاتهم الشفقة كاتلاهم.
• عاوزين يشوفوا الهلال.
• بخلوا كورتهم وبعاينوا للهلال.
• الحاصل شنو؟.
• عاوزين يشوفوا ناس هارونا وتوماس ديل كيف؟.
• جيوفاني محترف منضبط ومتلزم ودائماً ضاحك.
• لكن بالجد فقدنا شيبولا.
• شيبولا كان عنده نشاط وحيوية وحماس شديد للهلال.
• وكان في أي مباراة قمة بيسجل في المريخ.
• ما بتلفت.
• المرة دي عاوزين نشوف ياتو محترف بيسجل.
• جيوفاني المرة دي ما بمرق ساكت.
• اسمعوا الكلام دا.
• جيوفاني المرة دي عندو أكتر من قون.
• ولا بتلفت.
• الزول دا قاعد يتمرن ليه شهر ونص.
• شهر ونص تمارين ساكت.
• جيوفاني هو المحترف الوحيد الذي دخل في الفورمة وانسجم مع الهلال من اول يوم ليه في الهلال.
• لا قال عاوز يتأقلم.
• ولا قال امه عيانة في البرازيل.
• قاعد ومرابط مع الهلال.
• اجتهاد ورغبة.
• واحتراف حقيقي.
• اوتارا وهارونا وتوماس وسيرجيو الاربعة شغالين صاح في تمارين الهلال.
• عادوا في الوقت المحدد.
• وبيصلوا اول ناس.
• المحترفون اذا كان في التزام بمرتباتهم ما بكون عندهم مشكلة.
• نتمنى ان يكون هناك التزام في المرتبات.
• أمس في قناة الهلال أعلن عن تسليم المحترفين مرتبات شهر يوليو.
• يعني ح يمشوا سنار وهم صارفين.
• عاوزين هذا الالتزام من مجلس الهلال.
• عشان الهلال سيدخل لمرحلة هامة في الموسم.
• في الدوري وفي الكونفدرالية.
• الهلال ينافس للحفاظ على لقبه المحبب في الممتاز.
• وينافس للفوز بكأس السودان.
• الموسم الماضي الهلال اضاع الكأس ساكت.
• وينافس الهلال قارياً في الكونفدرالية.
• عاوزين الهلال باذن الله وتوفيقه يحقق البطولات الثلاث.
• عاوزين اجتهاد وكد.
• عاوزين عزيمة وارادة.
• وعاوزين التزام من مجلس الهلال.
• الموسم سوف ينتهي قبل شهر 11.
• يعني كل المنافسات المحلية والقارية باقي منها 4 شهور.
• الهلال سوف يلعب في الممتاز 14 مباراة في 3 شهور ونص.
• وينتظر ان يلعب الهلال في كأس السودان ان شاءالله 5 مباريات.
• وهناك 4 مباريات في الكونفدرالية تنتظر الهلال في مرحلة المجموعات.
• وباذن الله وتوفيقه يتفوق الهلال ويلعب 4 مباريات أخرى بعد التأهل من الكونفدرالية والوصول للنهائي باذن الله.
• تبقى هذه الفترة في حاجة للمزيد من الكد والجهد والعمل.
• الهلال في حاجة في الفترة الحالية للمساندة والتشجيع.
• ادعموا فريقكم.
• واقيفوا معاه.
• عشان يحقق الهلال المراد ونحصد ثمار كل البطولات التي يشارك فيها الازرق.
• خلاص دخلنا مرحلة الجد.
• المرحلة تحتاج الى وعي كبير.
• وعي من الجميع.
• الانتقادات للجهاز الفني مرفوضة.
• والتنظير.
• والكلام عن اللاعبين والتشكيلة دا ما وقته.
• امنحوا الجهاز الفني للهلال الصلاحية الكاملة.
• وما تدخلوا في شغله حتى في الانتقادات وتصدير الانطباعات والاراء الشخصية.
• بكرة عاوزين نشوف الهلال في سنار.
• وان شاءالله نسعد بالهلال في كل الاحوال.
• بدون تنظير.
• ولكن.
• ومفروض.
• ادعموا فريقكم ، فنحن في مرحلة الحصاد.
• مرحلة الحصاد ما عاوزة الكلام الكتير.
• ما عاوزة التنظير.
• مرحلة الحصاد هي مرحلة دعم وعون وسند.
• دعم من الجميع.
• وأهم شيء طبعاً مجلس الادارة يدعم الفريق بكل احتياجاته في هذه الفترة.
• ما عاوزين تقصير في شيء.
• عاوزين نفرح بالهلال.
• ونشتغل صاح.
• وقولوا باسم الله رجعنا.
• بلا روسيا.
• بلا اسبانيا معاكم.
• ………..
• ملحوظة : هلال وبس.
هوامش
• ناس المريخ عاوزين يأجلوا ليهم الدوري لمن يحلوا مشكلة جمال سالم.
• ولمن يرجع كوكو.
• وينسجم سيف تيري وحمزة.
• عاوزين الاتحاد ينتظرهم.
• ابراهومة في قناة الملاعب قال ان الاتحاد فاجأهم بالبرمجة.
• وقال ان فريق هلال الابيض غير جاهز او الى هذا اشار.
• رغم ان الاتحاد اعلن منذ فترة طويلة عن مباريات كأس السودان في اول يوليو.
• يعني ابراهومة فريقه سوف يكون جاهز لكأس السودان وما جاهز للممتاز.
• أي فريق بيلعب في كأس السودان عارف قبل فترة طويلة عن بداية النشاط واستئنافه من جديد.
• الناس شافوا تمارين الهلال دي قلبها اتقطع.
• الهلال جهازه الفني حاضر منذ فترة.
• والمحترفون حضور من البداية.
• نحن نعمل ليكم شنو؟.
• يعني هارونا يتأخر ليكم.
• ونزار حامد ما يرجع.
• نعمل شنو؟.
• خلونا بكرة نفرح بالهلال.
• ونبدأ على بركة الهلال.
• وننطلق.
• وتاني ما نقيف.
• بلا روسيا.
• بلا اسبانيا معاكم.
• وابقوا على سفر.
• …………….
• عاجل : مجلس المريخ (المعين) قال سوف يسافر باكمله للقضارف، إلّا يمشوا يساندوا (اشراقة) بعد كلام شداد!!.

click to Copy Short link: https://alsudanalyoum.com/Dk5WL

مشاركة
المادة السابقةتحرير جامعة الخرطوم!!.. بقلم عثمان ميرغني
المقالة القادمةبين المرض والمرض (شولة ،) بس !!.. بقلم محمد الطيب الأمين


ملحوظة خبر 24 | اخبار على مدار 24 ساعة : انقر هنا السودان اليوم لقراءة الخبر من مصدره.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا